الخميس، 9 أبريل 2009

وين راقدة

شاعر الجبل/ امحمد ساسي قرادة

وين راقدة يازعم ناس بلادي** لو نفر ما تلقـاش تاو تنـادي
ويـن راقـدة بالنومـي** وين هائمة في من البحور تعومي
لوم يابلادي ومن بيسمع لومي** منين الشقيق على الشقيق حيادي
نوجه انداي للبـلاد عمـومي** شيابينـكم وشبابـكم واندادي
*****
فيـكـم النـادي هـمو** زيلو الغطاء على رؤوسكم والتمو
واعطو الحن لبعضكم تنظمو** وتقضو حوايجكم من غير عنادي
راهو بلا لمان ماتسمـو** يريح حقكم ما بين جاي وغادي
لو كان ما لتميتـو** وخديتو الخبر من بعضكم واعطيتو
يريح حق ميوليش كان شكيتو** ولايرجعه بوليسكم ولا قاضي
كانش بلمتكم وما لميتو** باش تحرثوا فى ام العدف والوادي
*****
وين غارقة فى الغارق** وين خاشة مايطلعوك امـارق
ولا يوقضك ضيف الافا لاسارق** ولاتنبهـك تكويمة الاعادي
انتم قبل فيكم عز الشارق** وفيكم تريس تبان من لابعادي
*****
موش تعرفـو بـودية ** شن كانتا والوطن جمهورية
وبوساقكم جا ضد للتركية** عليه عاقلة الارياف واهل ابادي
وفي موته ندبة المحمودية** قعد دمعها على خذها بدادي
*****
ياشيخ نوض تبين** وحزم بلادك بالكلام اللين
باش نحلبو لليليه وقت محيل** نواكيع تجبذ فيه على الاجهادي
وياشيخ متقصرش راك تزين** كون صيد يهديك الكريم الهادي
انت ميصل الجدين ماكش هين** الام بنت بودية وبوك قرادي
ـــــــــــــــــــــــــــــــــــــــــــــــــــــــــــ
قصيدة وطنية من سنة 1961 ما هي إلا ترجمة لوقعنا الذي نعيش فيه، وإن كانت هناك بعض الخصوصية التي تناولها الشاعر، ولكن المهم عموم الفائدة.